Kulturaren erronkak lekuan bertan bizitzeko aukera eta gogoeta kolektiboa

Kulturaren erronkak lekuan bertan bizitzeko aukera eta gogoeta kolektiboa

Euskal Kulturaren Eragiltza masterra hiru bloketan antolatuta dago. Lehenik kulturaren egoera eta galdegai orokorrak lantzen dira; bigarrenik, hezkuntzan dituen erronkak aztertzen dira; eta, hirugarrenik, kultur-politiketan jartzen da arreta.

Ikasleek aukera izaten dute ikasgelatik harago ere ezagutzeko euskal kulturaren egoera eta erronkak, arlo batean edo bestean, leku bat bisitatuz, bertako aditu baten laguntzarekin. Zehazki, urtean hiru irteera antolatzen dira Euskal Herriko hainbat txokotara (urtero leku eta gai desberdinak lantzen dira). Adibidez, euskal kulturak hirigunean dituen erronkak eta ekimenak aztertzen dira, edo kultur-ekimen bat ezagutzen da. Masterreko ikasleei bezala,  ikasle ohiei ere eskaintzen zaie irteera horietara joateko aukera.

Bestalde, urtero antolatzen da unibertsitate-jardunaldi bat euskal kulturaren erronkei buruz hitz egiteko, izan hezkuntzan edo kultur-politiketan, besteak beste. Jardunaldi horietan masterretik eta Humanitate eta Hezkuntza Zientzien Fakultatetik kanpoko ikertzaileek eta kulturgileek ere parte hartzen dute, eta ikasle ohiek beren Master Bukaerako Lanen emaitzak aurkezteko aukera izaten dute. Jardunaldiak irekiak dira, eta interesatuta dagoen edozeinek du aukera horiek jarraitzeko.