Energia Sistema Adimendunen Masterreko ikasleek baterien biki digitaletan oinarritutako negozio ereduak proposatu dizkiete IKERLAN, CIDETEC, CEGASA eta BEEPLANETeko ordezkariei

Energia Sistema Adimendunen Masterreko ikasleek baterien biki digitaletan oinarritutako negozio ereduak proposatu dizkiete IKERLAN, CIDETEC, CEGASA eta BEEPLANETeko ordezkariei

Bateria pack bat muntatu, probatu eta balioztatu ondoren, ikasleei baterien Biki Digital bat garatzeko erronka proposatu zaie, eta biki digital hori aurkeztu dute enpresa epaimahaiaren aurrean.

---

Mondragon Unibertsitateko Energia Sistema Adimendunen Masterreko ikasleek kurtsoko diziplina anitzeko lehen erronka garatu dute. Baterien pack bat da, lehen moduluaren azken 3 asteetan muntatu, testatu eta baliozkotu dutena eta irakasgai batzuetan, esaterako, Biki Digitalen, Diseinu Termikoaren eta Biltegiratze Sistemen irakasgaietan eskuratutako ezagutzak aplikatuta lortu dutena.

Enpresetako ordezkariek osatutako epaimahaia

Josu Olmosek (Ikerlan), Mikel Arrindak (Cidetec), Urtzi Lazkanok (Cegasa) eta Egoitz Martinezek (Beeplanet) osatu dute epaimahaia, eta energia sistema adimendunen sektorearekin eta, zehazki, biltegiratze sistemekin oso lerrokatuta dauden zentro teknologikoetako eta enpresetako ordezkari horiek osatutako epaimahaiari aurkeztu zaizkio proiektuak. Enpresa horiek Mondragon Unibertsitateko Eskola Politeknikoaren laguntzaileak dira, hainbat esparrutan:

• Master horretako ikasleak dituzte plantilletan, eta ikasle horiek ikasketak eta praktikak uztartzen dituzte enpresa horietan.
• Unibertsitatearekin lankidetza estua dute ikerketa proiektuetan.

Enpresa horiek bi helbururekin parte hartu dute erronkan.

• Asmoa da ikasleak konturatzea aztertutako gaiak gure inguruko enpresen arazoetatik gertu daudela.
• Enpresek bertatik bertara ikusi ahal izan dute zein den Energia Sistema Adimendunen masterretik ateratzen diren etorkizuneko profesionalen profila eta zer gaitasun eskuratzen dituzten master horretan.

Erronka teknologikoa

Masterraren lehen erronka honek biltegiratze sistemak ditu ardatz. Baterien packa muntatuz, arlo horretako material eta gailu espezifikoekin (babesak, BMS, kudeatzaile termikoa...) maneiatzen ikasi dute ikasleek. Gainera, diseinu termikoari, gelaxkak testatzeari, monitorizazioari eta portaera termikoaren eta elektrikoaren modelaketari buruzko ezagutza aurreratuak eskuratu dituzte.

Horrez gain, sistema errealaren portaera erreplikatzeko gai den biki digitalaren prototipo bat ezarri dute, eta beren proposamenak aurkeztu ahal izan dituzte enpresako epaimahaiaren aurrean (bai aurkezpen teknikoa, bai fabrikatutako produktuaren maketa).